Indarkeria matxistari aurre egiteko 'Nik xinisteñat' kanpaina abian da eta saninazio festetan karpa egunero jarriko da kalean

Saninazio festetarako egun gutxiren faltan, indarkeria matxistarik gabeko jaien alde agertu da, Azpeitiko Udala. Beste behin, erasoen prebentzio, sentsibilizazio, informazio eta arretarako Nik Xinisteñat lemapean, indarkeria matxista, sexu indarkeria eta LGTBIQ+ fobiari aurre egiteko kanpaina jarri dute abian

Hasi dira festak eta horrekin batera, urte osoan egiten den hezkidetzarako programa, Emakumeentzako Jabetze Eskola, aholkularitza juridikoa eta beste zenbait ekintzez gain, festa inguruan gerta daitezkeen erasoei aurre egin edo erantzun ahal izateko informazio, sentsibilizazio eta arreta kanpaina abian jarri du Azpeitiko Udalak. Ezinbestekoa eta estrategikoa da erasoen inguruko prebentzio lana egitea erakundearentzat eta horrela azpimarratu nahi izan du Leire Goenaga Parekidetasun zinegotziak: “Urte osoan zehar aritzen gara prebentzio lanean proiektu, ekintza eta bestelakoak antolatzen eta gaian sakontzen, Emakume Txokoarekin elkarlanean, baina festetan, lanketa berezi baten beharra ikusten dugu. Festa giroan erasoak areagotu egiten direlako".

Horrela, uztailean, festen atarian, bereziki festei begirako lanketa eta prebentzio lana indartu dute, besteak beste, bai da bai legearen inguruko hitzaldia eskainiz. "Tabernariei ere beren tabernan erasoren bat gertatzen den kasuan jarraitu beharreko protokoloaren inguruko informazioa bidali diegu", gaineratu du. Banatutako euskarri fisikoen artean Azpeitiko tabernetan Indarkeria Matxistarik ez dela onartuko dioen, eta ligoteo sanoaren aldeko mezua zabaltzen duen kartela dago. Horrrela, bertan zabaltzen den mezuaz gain, herritarrei zuzendutako protokoloa ere badago bertan QR bidez edonork eskura izateko: "Erasoei aurre egiteko guztion inplikazioa behar" dela ere nabarmendu du.

Aurretik sentsibilizazioan eragiteko egindakoaz gain, festa egunetan ere erasoen inguruko lanketa, informazio eta arreta eskainiko da egunero. Horretarako, udal sail ezberdinak elkarlan estuan arituko dira, bai jaiek iraun bitartean baita ondoren ere. Gainera, azken urteetan egin bezala, karpa bat jarriko da eta festak iraun bitartean arratsaldetik goizaldera zabalik egongo da informazioa eta arreta eskainiz, Plaza Txikian.

Herritarrei festez "libre, gustura eta nahi bezala ospatzeko" deia ere egin nahi izan die. "Baina aldi berean, elkarzaintzarako deia ere egin nahi dugu. Erasoren bat sumatu edo ikustean elkarbabestu dezagun".

Erasorik Gabeko Gunearen xehetasunak

Malen Aldalur Parekidetasun teknikariak festetako kanpaina eta karparen inguruko xehetasunak azaldu ditu. Indarkeria Matxistarik gabeko Gunea festek iraun bitartean arratsaldetik goizaldera bitartean zabalik egongo da. Gunea plaza txikian kokatuko da uztailaren 30, 31ean eta abuztuaren 1ean."Karpak helburu bikoitza du; batetik, festen testuinguruan gaiak espazio publikoan presentzia izatea, eraso matxisten kontrako kontzientziazio lana burutuz; eta, bestetik, erasoren bat jaso duen emakumeren baten lehenbiziko artatze espazioa izatea", azaldu du.

Karpan, gaian adituak diren profesionalak izango dira eta bertan, erasoen inguruko informazioa eta aholkularitza eskainiko dute: "Edozein duda, aholkularitza, behar, eraso edo antzekoen aurrean, herritarrei karpara etortzeko deia egiten diegu. Bertan, profesionalak izango baitira laguntzeko eta artatzeko".

Karpa uztailaren 30ean, 18:00etatik 06:00etara, uztailaren 31n, 20:00etatik 04:00etara eta abuztuaren1ean, 18:00etatik 06:00etara izango da Plaza txikian.