Landa lursailak mugatu eta digitalizatzen jarraituko du udalak

Jabeen edo haien oinordekoen landa ondasunen inguruko ezagutza faltak edo ezjakintasunak mugak nahastea edo besterik gabe desagertzea eragiten du, baita landa eremua ez zaintzea ere. Horrek ondorio larriak eragiten ditu ingurune naturalean.

Iaz bezala, Azpeitiko Udala, Gipuzkoako Foru Aldundiko Landa Garapena Departamentuaren dirulaguntza erabilita, landa lurretan kokatutako 1.022 hektareako azalera duten 522 lursail baino gehiago mugatzeko lanekin hasi da, Geograma enpresaren laguntza teknikoarekin. Proiektu honetan udalak daukan erronka oso garrantzitsua da, landa-lurraren hedadura handia delako. Gainerako poligonoak hurrengo urteetan egingo dira.

Proiektuaren helburuak mugetan egon daitezkeen akats posibleak argitzea eta zuzentzea eta mugei eta mugarriei GPS koordenatuak ematea dira.

Lan hauek behar bezala burutzeko, lurjabeen kolaborazioa ezinbesteko baldintza da, auzokideen artean adostu behar baitira lursailen mugak eta mugarriak. Lanak egin ostean, markatutako mugak eta mugarrien koordenatuak dituzten planoak entregatuko zaizkie jabeei, behar izanez gero, katastroko mugak zuzenduz.

Bilera, azaroaren 13an

Jabeen parte hartzea borondatezkoa da eta ez die gastu ekonomikorik ekarriko. Hori bai, aldez aurretik, mugak garbitu, mugarriak topatu eta mugakideekin mugak adostu beharko dituzte neurketa topografikoak egiteko.

Azpeitiko 5, 11 eta 13. poligonoetako landa-lursailen jabe guztiek azaroaren 13an udaletxeko bosgarren solairuko aretoan egingo den proiektuaren azalpen-bilerara deitzeko gutun bat jasoko dute, bertaratzeko eskatuz. Bi bilera egingo dira: 11:00etan eta 17:00etan.