Matazak, Azpeitiko emakumeei buruzko memoria ariketa, ibilbide batean jasoa

Gaurkoan, memoria ariketa baten emaitza aurkeztu du Azpeitiko Udalak: Matazak proiektua. Urte luzez mamitu eta ondutako lana izan da, emakumeen memoria kolektiboa jasotzera eta zabaltzera datorren ariketa. Nagore Alkorta alkateak eta Leire Goenaga alkateordeak azaldu dutenez, “bigarren maila batean” geratu izan da emakumeek gizartean, ekonomian, politikan nahiz beste arlo askotan egindako ekarpena. “Bide luzea dago egiteko emakumeen oroimen historikoaren bueltan, eta, bide horretan, urrats bat gehiago egin nahi izan du Azpeitiko Udalak”, adierazi dute. Aurkezpenean izan dira Malen Aldalur Parekidetasun teknikaria eta Ione de la Cruz Emakume Txokoko dinamizatzailea ere.

Lan kolektiboa izan da Matazak. 2021eko apirilean elkartu ziren aurreneko aldiz herriko hainbat emakume, herriko emakumeek maila kolektiboan nahiz norbanako gisa egindako lanez, jardunez, istorioez eta kontuez aritzeko. Lehen bilera haren atzetik, beste hainbat etorri ziren, eta hogeiren bat emakume ere elkarrizketatu zituzten. Informazio ugari jaso, bildu eta kontrastatu zuten, eta horrela hartu du forma “Matazak. Azpeitiko Emakumeen Oroimen historikoa” proiektuak. Ibilbide honetan denean, udaleko Parekidetasun saila, Emakumeen Mahaia eta Emakume Txokoa elkarlanean aritu dira.

Ibilbidearen xehetasunak

Herrian ibilbide bat sortzea pentsatu zen hasieratik, besteak beste, emakumeek urtez urte okupatu dituzten espazioak berriro okupatzeko (gaur egun beste funtzio batzuk dituztelako) eta espazio horiei aitortza egiteko. Proiektuaren oinarrian, ibilbide fisiko pedagogiko bat dago. Ibilbidea, herriko erdigunean kokatuko da eta 9 geldialdi izango ditu. Geldialdi bakoitzean, emakume kolektibo baten inguruko informazioa jasotzeko aukera izango da panel batzuen bitartez (alpargaterak, lixiberak, andereñoak, telefonistak baserritarrak...). Panel bakoitzak, testu bana izango du irakurtzeko, eta ibilbidea audioz jarraitzeko aukera ere egongo da. Horretarako, mugikorrekin QR kodeak irakurri beharko dira.

Gaur aurkeztu da proiektua, baina urriaren 8an izango da herritarrentzat aurkezpen irekia. Ibilbideak nola funtzionatuko duen azalduko dute, eta proiektuaren prozesuaz ere arituko dira. Egun horretan, ez da ibilbide osoa egingo, hiru geldialdiko sarreratxo bat baizik (plazan, lehengo Telefonicaren lantegian eta garbitokian), ondoren herritarrek beren erara ibilbide osoa egiteko. Berezia izango da garbitokiko geldialdia: “Trapu Zikinak” antzerkiaz gozatzeko aukera izango da, Nafarroako Lore More antzerki konpainiaren eskutik.

Urriaren 8ko egitaraua

• 11:00etan, plazan, Matazak proiektuaren ibilbidearen aurkezpena.
• 11:45ean, garbitokian, “Trapu Zikinak” antzezlana ikusteko aukera
• Ondoren, garbitokian bertan, memoria ariketa hau egiten parte hartu dutenei eskertza.

Guztia doan izango da, baina gonbidapenak hartzea ezinbestekoa izango da garbitokiaren edukiera mugatua dela eta. Gonbidapenak online (https://entradium.com/es/events/matazak-azpeitiko-emakumeen-memoriari-buruzko-bisita-gidatua) edo Emakume Txokoan eskuratu daitezke.