Txupinazoa botata, gaur hasiko dituzte Korputz festak Elizkalean

18:00etan botako dute txupinazoa, eta horren ostean, kalejira egingo dute Juan Antxieta musika eskolako gaztetxoek. Buruhandiak ere orduan aterako dira. 19.00etan, hil diren Elizkaleko bizilagunak omenduko dituzte, meza batekin. 20:00etan, berriz, Andoni Ollokiegiren emanaldia izango da Mendizaliek tabernaren atarian.

Bihar, ostirala, musikak izango du protagonismo osoa: Juan Antxieta musika eskolak gaztetxoek kalejira egingo dute 18:00etan; haien atzetik, Kantu Jirakoen txanda izango da, 19:00etan; eta 20:30etik aurrera, Porru DJ musikariak hartuko du erreleboa.

Etzi, larunbata, eguerdian hasiko da festa, Itsasi taldeko dantzariekin. Iluntzean, berriz, 19:30etik aurrera, trikitilariak ibiliko dira kalean, eta 20:00etan lagunarteko afaria egingo dute, Main tabernan. 20:30etik aurrera, Imuntzo eta Belokik alaituko dute giroa. Gauerdian zozketa bat eginez amaituko dituzte festak.