Adi! Larunbatean eta igandean, guztiz itxita egongo da Azpeitirako sarbidea autoentzat Ezkuzta parean

Hasieran aurreikusi baino eragozpen gehiago sortuko dituzte Ezkuztako zubiko obrek asteburuan. Larunbateko (martxoak 14) 06:00etatik hasi eta igandeko (martxoak 15) 22:00etara bitartean, ibilgailu pribatuentzat guztiz itxita egongo da Urola ibaiaren gaineko zubia, baita Magdalenako sarbidea ere.

• Larunbatean, 06:00etatik 14:00etara. Zubiaz gain, Magdalena auzoko errepidea ere itxita egongo da ibilgailu guztientzat, baita autobusentzat eta taxientzat ere. Larrialdi zerbitzuei bakarrik utziko zaie pasatzen.
• Larunbateko 14:00etatik igandeko 22:00tara. Zubia itxita egongo da, baina garraio publikoak (autobusak eta taxiak) eta larrialdiren bat dutenek Magdalenako errepidetik barrena izango dute GI-631 errepidera sartzeko (edo handik ateratzeko) aukera.
• Igandean, 22:00etatik aurrera. Zubia irekita egongo da, gaur egun bezala, semaforoekin txandaka bideratuz trafikoa. Horrez gain, ibigailu guztiek izango dute Magdalenatik barrena GI-631 errepidera sartzeko aukera.

Magdalena auzoko trafikoa kontrolatzeko, semaforoak jarriko dira; horrez gain, errepidea estua denez, autobusek pasatzeko aukera izan dezaten, kendu egingo dira errepide bazterreko aparkalekuak. Azpeitiko herri sarreretan ere kartelak egongo dira obren berri emanez.

Itxita egongo diren errepide zatiak saihesteko baserri bideak ere badauden arren, ez da gomendatzen horietatik joatea; izan ere, ez daude prestatuta trafiko handiarentzat. Beraz, Elgoibartik barrena joan beharko da Zestoa aldera.