Agortu dira 'Azpeitia Zaindu' kanpainako bonu guztiak

Azpeitiko Udalak eta Bertan Merkatari Elkarteak jakinarazi dute amaitu direla Azpeitia Zaindu kanpainan salgai jarritako ia 4.000 bonuak. Atzo, azaroaren 5ean, arratsaldez hasi zen salmenta, eta 24 ordu bete baino lehen agortu dira bi bideetatik eskuragarri zeuden bonu guztiak.

Internet bidezko salmentaren hasieran arazo teknikoak izan ziren. Behin arazoak konponduta, atzo gauean bertan agortu ziren online erosi zitezkeen bonuak. Aurrez aurreko salmentara bideratutakoak, berriz, gaur eguerdi aldera amaitu dira.

Antolatzaileek eskerrak eman dizkiete herritarrei kanpainak izan duen harreragatik, baita hasierako gorabeheren aurrean erakutsitako pazientziagatik ere. Era berean, barkamena eskatu dute arazo teknikoek eragindako eragozpenengatik.

Herriko saltokietan erabiltzeko garaia

Bonuak eskuratu dituzten herritarrek 2027ko urtarrilaren 5era arte erabili ahal izango dituzte kanpainari atxikitako Azpeitiko merkataritza, ostalaritza eta zerbitzu establezimenduetan. Bonu bakoitzak 50 euroko balioa du, 10 euroko bost txarteletan banatuta, eta 35 eurotan erosi ahal izan da.

Salgai jarritako bonuez gain, aurten 18 urte betetzen dituzten herritarrentzako 174 bonu bideratu dira; guztira, 4.000 bonu izango ditu kanpainak. Ekimenak herritarren erosketak erraztea eta herriko negozio txikien jarduera sustatzea du helburu.

Udalak eta Bertanek herritarrak animatu dituzte bonuak herriko saltokietan erabiltzera, kanpainak sortutako interesa tokiko merkataritzarentzako benetako bultzada bihur dadin.