Basazabal jauregia eta parrokia irekita egongo dira berotik babestu nahi dutenentzat

Toki freskoren batean egon nahi dutenek zabalik izango dute Basazabal jauregia, gaur, 22:00ak arte, eta Soreasuko Sebastian Donearen parrokia ere bai, 20:00ak arte. Horrez gain, ohiko zenbait udal zerbitzu (liburutegia, kiroldegia, igerilekuko egoteko gunea…) ere egokiak dira berotik babesteko. Era berean, itzalpean egoteko, liburutegi atzeko berdegunea eta Loiolako lorategiak dira aukeretako batzuk. Izarraizko Ateko ur txorroek bustitzeko aukera ere ematen dute.

Eusko Jaurlaritzako Larrialdiei Aurre Egiteko eta Meteorologiako Zuzendaritzak, datozen egunetan aurreikusten diren muturreko tenperatura altu eta iraunkorren aurrean, eta horiek eragin ditzaketen ondorio negatiboak prebenitzeko edo arintzeko, Osasun Sailaren 2026ko Bero Planeanan Osasun Publikoko Zuzendaritzak jasotako autobabes-gomendioak jarraitzea aholkatu du:

Aire zabaleko berotik babestea

• Saihestu eguneko erdiko orduetan eguzkitan egotea.
• Ez jarri inoiz zuzenean eguzkitan 6 hilabete baino gutxiagoko haurtxoak.
• Erabili kapela, eguzkitako betaurrekoak eta eguzki-babes egokia.
  Jantzi arropa arina, nasaia eta transpiragarria.
• Saihestu jarduera fisiko bizia egitea, batez ere tenperatura handieneko uneetan.
• Kontsultatu osasun-langileekin sintoma hauek agertzen badira: ahulezia, nekea, zorabioak, goragalea, ikusmen lausoa edo ordubetetik gora irauten duten alditxarrak.

Etxea fresko mantentzea

• Itxita eduki leihoak eta pertsianak bero gehien egiten duen orduetan.
• Gauez etxebizitza aireztatu, gelak freskatzeko.
• Saihestu eguneko erdiko orduetan beroa sortzen duten etxetresna elektrikoak erabiltzea.
• Haizegailuak kontuz erabili, 35 ° C-tik gora ez baitute gorputzeko tenperatura murrizten.
• Freskatu ur hotzeko dutxa edo bainuekin, edo zapi hezeak erabilita aurpegian eta eskuetan.
• Ezin bada etxebizitza fresko mantendu, igaro egunean 2-3 ordu klimatizatutako lekuetan, esaterako, eraikin publikoetan.

Deshidratazioa saihestea

• Edan maiz ura eta likidoak, egarri izan arte itxaron gabe.
• Saihestu kafeina, alkohola edo azukre asko duten edariak, deshidratazioa errazten baitute.
• Handitu fruta, barazki eta entsaladen kontsumoa gatz mineralak berritzeko.
• Saihestu berora egokitzea zailtzen duten otordu oparoak, koipetsuak edo astunak.

Pertsona zaurgarrienak zaintzea

• Arreta berezia eman haurtxoei, adingabeei, haurdun edo edoskitzaroan dauden emakumeei, adinekoei eta gaixotasunak dituztenei.
• Ez utzi inoiz inor ibilgailu itxi batean, ezta itzalean ere.
• Zaindu bereziki bakarrik bizi diren edo mendekotasuna duten adinekoak, haiek egunean behin gutxienez bisitatuta.

Laneko arriskuen prebentzioa

• Lanak planifikatzea, bero handieneko orduetan ez egiteko.
• Etengabe hidratatzea.
• Ur edangarrirako sarbidea duten eremu hoztuak gaitzea, atsedenaldiak maiz egin ahal izateko.
• Arropa arina eta eguzki-babesa erabiltzea.
• Intsektuak uxatzea eta ur geldiko eremuak saihestea, bektoreek transmititutako gaixotasunak prebenitzeko.

Bero kolpe bat izanez gero zer egin

• Pertsona hori itzalera edo leku fresko batera eraman.
• Arropa askatu eta soberan dagoena kendu.
• Ur freskoa edo zapi bustiak jarri gorputzean.
• Haizatu edo aireztatu.
• Kontziente badago, eman ura trago txikitan.