Bueltan dira udal gazteria zerbitzuak

Herriko haur, nerabe eta gazteen beharrei, nahiei, arazoei, kezkei eta abar erantzuteko sortutako saila da Gazteria Saila. Haren lanaren oinarria heziketa da; lan eremua, berriz, aisialdia. Haur, nerabe eta gazteentzat bideratutako ekipamenduak erabiltzen dituzte haurren, nerabeen eta gazteen heziketa prozesuetan bidelagun izateko. Horretarako, aisialdi hezitzailean adituak diren hezitzaileez osatutako lantaldea dute. 

Iturritxiki eta Txiki Txoko ludotekak HH5 eta LH6 bitarteko haurrei zuzendutako zerbitzuak dira; Gaztelekua, berriz DBH1 eta Batxilergo 2 bitarteko nerabeei zuzendutakoa. Datozen egunetan hasiko da haurren zein nerabeen izen-ematea. 

Ludoteketako izen ematea

Ludoteken kasuan, irailaren 23tik 25era, biak barne, izango da. Bi ludoteketan, goizez zein arratsaldez izena emateko aukera egongo da baina ordutegi ezberdina izango dute. Txiki Txoko ludotekan, irailaren 23an, asteazkenean, 10:00etatik 12.00etara izango da izena emateko aukera. Irailaren 24an eta 25ean, berriz, 15:30etik 19:00etara. Iturritxiki ludotekan, aldiz, goizez izena emateko aukera, irailaren 24an, ostegunean, egongo da, 10:00etatik 12:00etara. Arratsaldez, berriz, irailaren 23an eta 25ean egin ahal izango da, 15:30etik 19:00etara. 

Ikasturtean zehar joango diren ludotekan eman behar dute izena haurrek, eta urteko kuota ordaindu beharko da (25€). Bestelako zalantza eta azalpenak bertan emango dituzte hezitzaileek. 

Gaztelekuko izen ematea

Udal Gaztelekuaren kasuan, irailaren 23tik 25era irekiko dute erabiltzaile izateko izen-ematea. Goizez zein arratsaldez egongo da aukera: arratsaldez, irailaren 23 eta 25ean, 15.30etik 19.00etara; goizez, berriz, irailaren 24an, ostegunean, 09:30etik 13.30era. Gaztelekuko erabiltzaile izateko ez da kuotarik ordaindu behar, baina bertako erabiltzaile izatea nahi duten DBH1ko erabiltzaileen zein erabiltzaile berri izango diren nerabeen gurasoek nahitaez bertaratu beharko dute izena ematera. 

Irailaren 28an irekiko dituzte ludotekak eta irailaren 29an Gaztelekua. Informazio gehiago nahi izanez gero, deitu telefono hauetara: Gazteria: 943 157161 / GIB 943 157160