Udalak eta Gipuzkoako Foru Aldundiak Madalena auzoko eremu degradatua natura eta hezkuntza gune bihurtu dute

Nagore Alkorta Azpeitiko alkateak eta Jose Ignacio Asensio Jasangarritasuneko diputatuak Madalena auzoko eremu degradatuko obren amaiera bisitatu zuten atzo arratsaldean. Gune horretan egindako proiektuari esker, 3.882 m² lurzoru degradatu berreskuratu dira, eta eragin positiboa izan du 28.055 m²-ko azaleran.

Besteak beste, hiru baso autoktono mota (hariztia, haltzadia eta artadia) berritu dira, eta landaredi autoktonoari buruzko hedapen, dibulgazio eta sentsibilizazio espazio bat sortu da. Zaharberritutako eremuak mintegi txiki bat, putzu bat, naturan ikasgela gisa erabiltzen den harmaila bat eta Urola ibaiaren behatoki bat ditu. Eremu berri horrek aukera emango die herritarrei zein bisitariei tokiko flora hurbiletik ezagutzeko, ingurumen-kontzientzia sustatzeko eta tokiko basoak kontserbatu eta birsortzearen garrantzia hobeto ulertzeko.

Azpeitiko Udalak egin du proiektua; Ekopaisaia enpresa arduratu da obrak egiteaz eta Asmatu ingenieritza obra zuzendaritzaz. Proiektua Gipuzkoako Foru Aldundiaren Jasangarritasun Departamentuaren Azpiegitura berdeen dirulaguntza lerroaren bidez finantzatu da. 45.000 euroko aurrekontua izan du.