Webgune berria: erabilterrazagoa, argiagoa eta erakargarriagoa

Mikel Odriozola zinegotziak azaldu duenez, zaharkituta zegoen aurreko webgunea. Berrituta, hainbat helburu lortu nahi izan ditu udalak; besteak beste, erabiltzaileei behar duten informazioa errazago eskuratzen laguntzea, webgunearen bidez egiten diren tramiteak errazago egiten laguntzea, mugikorren bidez nabigatzeko erraztasun handiagoak ematea…  “Eguneratu aurretik, udaleko sail guztietako langileen ekarpenak ere jaso dira, lanerako ere erosoagoa izan dadin webgune berria”, esan du Odriozolak.

Euskara ardatz, eleaniztasuna lagun

Webgunearen ezaugarrietako bat da eduki guztiak bost hizkuntzatan kontsultatzeko aukera emango duela. Euskara hutsean egongo da ataria, baina Elhuyarren Elia itzultzaile neuronala du txertatuta. Hala, klik baten bidez, gaztelaniaz, frantsesez, ingelesez, katalanez eta galegoz ere irakurri ahal izango dira edukiak.

Gaur egungo joerak aintzat hartuz, gailu mugikorretara egokitutako diseinua du. Are gehiago, telefono mugikorren bidezko nabigazioa erdigunean jarrita egin du garapena Codesyntaxek. Udalak 2023an berritu zuen irudi korporatiboa, eta identitate bisual hori hartu da kontuan webgune berriaren diseinuan ere.

 Aukera ugari 

Udalaren zerbitzuen berri modu zabalean ematen du atari berrituak, eta tramite ugari egin daitezke haren bidez (ordainketak, aretoen erreserbak, dirulaguntzen eskaerak…). Pixkanaka, udalak aukera berriak ere jarri nahi ditu martxan webgunearen bidez, hala nola izen-emateak, artxiboko argazki zaharrak kontsultatzeko aukera…