Itzulpen automatikoa / Machine translation

  • Kultura

Xapre omenduko dute sanjosetako trikiti jaialdian

2024/03/12
Xapre omenduko dute sanjosetako trikiti jaialdian

Trikiti-zaleek urtero-urtero egutegian markatuta izaten duten ekitaldietako bat izaten da sanjosetako trikiti jaialdia. Bete egiten da Soreasu aretoa, eta hala egingo da aurten ere. Larunbatean (martxoak 16), 17:30ean hasiko da jaialdia, eta Jose Luis Etxeberria ‘Xapre’ omenduko dute.

Gaur aurkeztu dute sanjosetako trikiti jaialdia Aitor Larrañaga Azpeitiko Udaleko Kultura batzordeburuak eta Maider Jauregi, Aitziber Otegi, Jose Luis Garmendia Laja eta Andoitz Antzibar Euskal Herriko Trikitixa Elkarteko kideek. Han izan da aurtengo jaialdian omenduko duten Jose Luis Etxeberria ‘Xapre’ ere (Zaldibia, 1957).

Elkarteko kideek nabarmendu dute trikiti munduan pertsona “oso maitatua” dela Xapre. “Umila izan da, eta umiltasun horretatik bazter guztietan ibili da; bidea egin du, baina ez da hain ezaguna izan trikiti zirkulutik kanpo”. Trikitiaren alde lan asko egiteaz gain, bertsolaritzarekin ere harreman estua duela azaldu dute.

Hasiera batean proposamena harrituta hartu zuen arren, Xaprek esan du poz eman diola omenaldirako berataz akordatu izanak. “Trikitilaria izan naizela sinesteko motiboa emango dit”. Gaur egun plazak “erabat utzita” dituela esan du, baina iragarri du larunbatean akaso trikitia hartuko duela. “Hori esan didate eta… Jendea gustura etortzen da sanjosetako jaialdira, tokia ere ederra da, eta nik uste etortzen denak ondo pasatuko duela”.

Lixarra anaiak, Ane Etxezarreta eta Sara Iriarte, Zaldibiko lagunak, Xabier Zabala eta Andoni Egaña, Jon Ostolaza eta Andoni Larrañaga, Daniel Oiarbide eta Pello Urdangarin eta Imuntzo eta Beloki, Iker Allur eta Jokin Tolosa ariko dira aurtengo jaialdian.

Jaialdia amaitu ostean herrian sortzen den giroa ere nabarmendu dute antolatzaileek. “Taberna izkina guztietan egoten da soinuren bat, trikitilariren bat edo talderen bat. Afariak ere egiten ditu jendeak, eta kalean izaten du jarraipena jaialdiak”.